Аҟәатәи аспортсменка Диана Чалиан аҩбатәи аҭыԥ аанылкылеит Салоники ақалақь аҿы имҩаԥысуаз самбо ақәԥаразы ақәыԥшцәа рыбжьара адунеи ачемпионат аҿы
Жьҭаарамза 11-14 рзы Салоники (Бырзентәыла) ақалақь аҿы имҩаԥысуан самбо ақәԥаразы Адунеи ачемпионат ақәыԥшцәа рыбжьара. Иааизакны аицлабра иалахәын 35 ҳәынҭқарра рҟынтәи 500-ҩык инареиҳаны аспортсменцәа. Аҭыԥантәи аспорт абзиабаҩцәа азҿлымҳара ду аадырԥшит.
Урыстәылатәи Афедерациа еизгоу акоманда аилазаараҿы ибзианы лхы аалырԥшит акапантә категориа 60кь рҟынӡа еицлабзуаз аҟәатәи аспортсменка Диана Чалиан. Ас еиԥш зыҩаӡара ҳараку атурнир аҿы раԥхьаӡа акәны лхы шалалырхәуазгьы уи иаалырԥшит агәазыҳәара, хынтә аиааира лгеит. Знызаҵәык даҵахеит афиналтә еиԥылараҿы Казахстанынтәи аспорстменка лыҟны, иара убри алагьы Диана аҩбатәи аҭыԥ аанылкылеит.
Уажәы Диана илзыԥшуп аиҳабацәа рыбжьара Урыстәылатәи Афедерациа ачемпионат аҿы, - ааицҳаит Аԥсныпресс ахь аспорстменка лазыҟаҵаҩ Андреи Погосов.
