Аҧсны Аҳәынҭқарра Ахада Урыстәыла ашәҟәыҩҩцәа Реидгыла аделегациа идикылеит

Аделегациа аусуратә ҭаара аҳәаақәа ирҭагӡаны аҧснытәи ашәҟәыҩцәа урыстәылазегьтәи ашәҟәыҩҩцәа реицлабрақәа, иара убас ашәҟәыҩҩцәа рсеминарқәа, алитературатә ҧхьарақәа рылархәразы алшарақәа ирылацәажәараны иҟоуп.

Аҟәа. Жәабранмза 25. Аҧсныпресс. Аҧсны Аҳәынҭқарра Ахада Рауль Ҳаџьымба Урыстәыла ашәҟәыҩҩцәа Реидгылара аделегациа идикылеит. 

Аҳәынҭқарра Ахада Аҧсни Урыстәылеи ашәҟәыҩҩцәа рыбжьара аимадара арӷәӷәара хықәкыс измоу, Урыстәыла ашәҟәыҩҩцәа Реидгыла  аделегациа иаланы иааз   асасцәа аҧсшәа реиҳәеит.

"Ҳарҭ жәытәнатә аахыс ҭоурыхла ҳаимадоуп. Ҳарҭ ҳәынҭқаррак аҿы ҳанхон, ҳарҿиарагьы ҳәынҭқаррак аҟны имҩаҧысуан. Ҳәарада, ҳара ҳаизыҟазаашьақәа аҧхьаҟагьы аҿиара роуроуп. Сара иҭабуп ҳәа шәасҳәоит абас еиҧш иҟоу аҧшьгара шәыманы ҳтәыла шәахьаҭааз, иахьа ҳашәҟәыҩҩцәеи ҳпублицистцәеи шәахьрылагылоу.

Шәара Аҧсны шәыҟазаара аҧсуа литература ашьаҭаркҩы Дырмит Гәлиа 145-шықәса ихыҵра арыцхә иақәшәеит. Иахьа, аамҭа уадаҩ аан иара дызлагаз аус узықәгәыӷша анапқәа арнуп ҳәа уҳәар алшоит.

Ҳара Аҧсни Урыстәылеи реизыҟазаашьақәа аҧхьаҟагьы иҿиалар ҳҭахуп. Гәык-ҧсыкала ишәзеиӷьасшьоит шәусураҿы ақәҿиарақәа”, – ҳәа иҳәеит Аҳәынҭқарра Ахада.

Урыстәыла ашәҟәыҩҩцәа Реидгыла Ахантәаҩы Николаи Иванов Аҳәынҭқарра Ахада иҟаиҵаз адкыларазы иҭабуп ҳәа иеиҳәеит.

“Урыстәыла ашәҟәыҩҩцәа Реидгылаҟны, зхатә стиль змоу, збызшәа ҧшӡоу Аҧсны ашәҟәыҩҩцәеи ҳареи ҳаимадарақәа еиҭашьақәыргылазарц даара иаҳҭахуп.  Ҳара еилаҳкаауеит аамҭаказы ҳаимадарақәа шыҧсыҽыз, аха урҭ ырӡӡамызт. Уажәы Краснодартәи ашәҟәыҩҩцәа Реиҿкаареи Аҧсны ашәҟәыҩҩцәа Реидгылеи русеицуразы аиқәшаҳаҭра бжьаҵоуп. Аус руеит Москвеи Аҟәеи реиҭагаҩцәа, ицәырҵит еиҭагоу ашәҟәқәа, уи ҳара агәахәара ҳнаҭоит. Ҟарачы-Черқьесиеи Аҧсни рышәҟәыҩҩцәа аимадара бзианы ирыбжьоуп”, – ҳәа иҳәеит Николаи Иванов.

Иаагозар, аҧсуа шәҟәыҩҩцәа урыстәылазегьтәи ашәҟәыҩҩцәа реицлабрақәа, иара убас ашәҟәыҩҩцәа рсеминарқәа, алитературатә ҧхьарақәа рылархәразы алшарақәа ирылацәажәараны иҟоуп.

Аҧсны ашәҟәыҩҩцәа Реидгыла Ахантәаҩы Вахтанг Аҧҳазоу, аҧснытәи ашәҟәыҩҩцәа Урыстәыла ашәҟәыҩҩцәа рделегациа аара аҵак ду шарҭо азгәеиҭеит.

“Ҳәарада, ҳара Аҧсни Урыстәылеи рыбжьара алитературатә еимадарақәа реиҭашьақәыргылареи рыҿиареи аҭахуп ҳәа иҳаҧхьаӡоит. Аҧсуа шәҟәыҩҩцәа ахаангьы аурыс бызшәахь еиҭаргон раҧхьаӡа иргыланы аурыс бызшәахьтә егьырҭ абызшәақәа рахь. Ҳара ҳзы аурыс бызшәа есқьынгьы аҵак ду шамоу иаанхоит.

Иҟоуп хаҭалатәи аизыҟазаашьақәа, ҳара ари аимадара адгылара аҳҭар ҳҭахуп. Аҵыхәтәантәи ашықәсқәа рзы Урыстәыла ашәҟәыҩҩцәа Реидгыла арегионтә ҟәшақәеи ҳареи ҳабжьара аимадарақәа шьақәгылеит, раҧхьа иргыланы, Аҩадакавказтәи аиашьаратә республикақәеи, Краснодартәи атәылаҿацәтә еиҿкаареи ҳареи ҳабжьара.

Аҧхьаҟа иазҧхьагәаҭаны иҳамоуп Крыми, егьырҭ арегионтә ҟәшақәеи ҳареи ҳабжьара аиқәшаҳаҭра ҳабжьаҵара. Урыстәыла ашәҟәыҩҩцәа Реидгыла аделегациа аара хҭыс бзиоуп ҳәа иҳаҧхьаӡоит, избанзар уи аусеицура атрадициақәа рырҿыцра атәы аҳәоит”, – ҳәа иҳәеит Вахтанг Аҧҳазоу.