Аҧсны абанктә системақәа ркассақәа рахь иалагалахеит 8 190 млн мааҭ инареиҳаны, 10 млн доллари, 1,4 млн еврои

Аҧсны Амилаҭтә Банк “Аҧаратә хҳәаа” ҭнажьит.

Аҟәа. Лаҵарамза 26. Аҧсныпресс. Аҧсны Аҳәынҭқарра Амилаҭтә Банк лаҵарамза 1, 2020 шықәса рзы “Аҧаратә хҳәаа” ҭнажьит. Аусшәҟәы аҿы иаагоуп иарбоу арыцхә азы Аҧсны абанктә система аҿы иҟоу аҭагылазаашьа азы адыррақәа.

Убас, Аҧсны Амилаҭтә Банк иҟанаҵо адыррақәа рыла 1, 2020 шықәса рзы Аҧсны абанктә системақәа ркассақәа рахь иалагалахеит 8 190 млн мааҭ инареиҳаны, 10 млн доллари, 1,4 млн еврои.

Алагалақәа аиҳарак Урыстәылатәи Афедерациа амааҭқәа рыла имҩаҧгоуп:
– ахәаахәҭра аҟынтәи ахашәалахәы – 32,6%;
– хазхаҭалатәи ахаҿқәа рҟынтәи аҧара аиагаразы имҩаҧгоу аоперациақәа рҟынтәи – 15,6%;
– аиуристтә хаҿы аҧҵарада аусдкылара знапы алаку атәылауаа иалагалахо аҧаратә хархәагақәа – 12,5 %;
– зыхә шәатәу амаҵзурақәа рынагӡара аҟынтәи – 6,3%;
– ауааҧсыра рыла акредитқәа ргареи ршәареи аҟынтәи ахашәалахәы – 5,5%;
– хазхаҭалатәи ахаҿқәа рҧарашьҭаҵара аҟынтәи – 4,1%;
– хазхаҭалатәи ахаҿқәа рхыҧхьаӡаратә ҧхьаӡарақәа рахь – 4,1%;
– хазхаҭалатәи ахаҿқәа аҳәаанырцәтәи авалиута раадырхәара аҟынтәи – 3,3%.

Аҧсны абанктә система акассақәа рҟынтәи лаҵарамза 1, 2020 шықәса рзы ирыҭоуп: Урыстәылатәи Афедерациа 6 075,8 млн мааҭ, Еиду Америкатәи Аштатқәа 9,9 млн доллар, иара убас 1,3 млн евро. Аиҳарак Урыстәылатәи Афедерациа аҧаратә хархәагақәа роуп ирыҭахо:
– хазхаҭалатәи ахаҿқәа рхыҧхьаӡаратә ҧхьаӡарақәа рҟынтәи – 19,8%;
– аиуристтә хаҿы аҧҵарада аусдкылара знапы алаку атәылауаа рхыҧхьаӡаратә ҧхьаӡарақәа рҟынтәи – 18,1%;
– ауалафахәи асоциалтә шәатәқәеи рызшәара азы – 8,6%;
– анаплакқәеи, аиҿкаарақәеи, аусбарҭақәеи рзы атауар-материалтә хәдуқәеи, абылтәи ахьшьтәи раахәаразы – 6,2%;
– хазхаҭалатәи ахаҿқәа рҧарашьҭаҵа ахыҧхьаӡаратә ҧхьаӡарақәа рҟынтәи – 5,5%;
– хазхаҭалатәи ахаҿқәа рахь апаратә хархәагақәа рыиагара азы – 4,0%;
– атәанчахәы ашәара, ацхыраагӡатә ҧаратә хархәагақәа, абгаҧсатә шәатәқәа рзы – 3,9%.