Аԥсуа-абазатә бызшәа аҿиареи аиқәырхареи ртема иазку адискуссиатә клуб мҩаԥысит

И. Папасқьыр ихьӡ зху амилаҭтә библиотекаҿы апедагогикатә конференциа “Актәи аԥсуа ҵарадырратә салон” аҳәаақәа ирҭагӡаны адискуссиатә клуб мҩаԥысит.

Аҟәа. Абҵара 18. Аԥсныпресс. Саид Џьарсалиа. Адискуссиатә клуб рхы аладырхәит аҵарауаа, Аԥсны иреиҳау аҵараиурҭақәеи араионқәа рҟынтәи арҵаҩцәа.

“Аԥсуа бызшәеи абаза бызшәеи рыҿиареи реиқәырхареи алацәажәара даара иуадаҩуп. Иахьатәи ҳаилатәараҿы доусы ҳгәаанагарақәа еибаҳҳәар ауп. Иҳамоу ауадаҩрақәа мҵәахыкәа ҳалацәажәароуп, аформалтә ҟазшьа аҵамҵакәа”, – иҳәеит аилатәара аартуа, Аԥснытәи аҳәынҭқарратә университет афилологиатә факультет аԥсуа бызшәа акафедра аиҳабы Баҭал Ҳагәышь.



Адискуссиатә клуб аплан инақәыршәаны ажәахәқәа рыманы иқәгылеит:
Ҟарачы-Черқьесстәи Ареспублика Абазатәи аминиципалтә раион администрациа аҵара аҟәшеи акультуреи реиҳабы Земфира Муратова. Уи далацәажәеит “Абаза бызшәа аҿиареи аиқәырхареи рзы Абазатә муниципалтә раион аусуратә система”;
Аҟәатәи ахәыҷтәы баҳча “Аӡыхь” ааӡаҩ Саида Малиаԥҳа – “Ахәыҷбаҳчаҿы зхатәы бызшәа ззымдыруа ахәыҷқәа ааӡаҩцәа аус шрыдыруло”;
Аҟәатәи абжьаратә школ №1 арҵаҩы Лиудмила Џьынџьиаԥҳа – “Аԥсуа бызшәа ззымдыруа ахәыҷы аԥсуа школ ахь данааиуа изцәырҵуа апроблемақәа раԥыхразы иҟаҵатәу гәаанагарақәак”;
Аҟәатәи абжьаратә школ №5 арҵаҩы Асҭанда Чагәааԥҳа – “Аԥсуа школқәа аиҳабыратә классқәа рҿы аԥсуа бызшәа дырҵараан ицәырҵуа апроблемақәа”;
Аԥснытәи аҳәынҭқарратә университет аԥсуа бызшәа акафедра арҵаҩы еиҳабы Аида Кәарҷелиаԥҳа – “Аԥсуа бызшәа аҩаӡаратә система”.

Анаҩс, еизаз иалацәажәеит аԥсуа бызшәа ашколқәеи ахәыҷбаҳчақәеи рҿы иамоу ауадаҩрақәеи, урҭ рыӡбаразы иҟаҵатәу аусмҩаԥгатәқәеи.