Аҳәынҭқарратә аурыс драматә театр аҿы 37-тәи атеатралтә сезон “Ревизор” ала иаатуеит

Ф. Искандер ихьӡ зху Аҳәынҭқарратә аурыс драматә театр аҿы 37-тәи атеатралтә сезон аартра иазкны абрифинг мҩаҧган.

Аҟәа. Жьҭаарамза 24. Аҧсныпресс. Лана Ҵәыџьҧҳа. Абрифинг аартуа, Ф.Искандер ихьӡ зху Аҳәынҭқарратә аурыс драматә театр анаҧхгаҩы хада Иракли Хьынҭәба, ииасхьоу 36-тәи атеатралтә сезон даара хра алан, уи аколлектив аусура алҵшәа бзиеи аиҭакрақәеи ирыдҳәалан ҳәа иазгәеиҭеит.

Ахәҭакахьала, акультуреи аҭоурыхтә-культуратә ҭынха ахьчареи рминистр Ельвира Арсалиаҧҳа иазгәалҭеит: “2018 шықәсазы иазҧхьагәаҭаны иҳамоуп 100 рҟынӡа аспектакльқәа рықәыргылара. Уи шықәсык иалагӡаны, иааиҧмырҟьаӡакәа ахәаҧшыҩ иҽимадара алыршахоит ҳәа ауп иаанаго.  Сара шәара зегьы 37-тәи атеатралтә сезон азы ақәҿиарақәа шәзеиҕьасшьоит”.

Аҳәынҭқарратә аурыс драматә театр  анаҧхгаҩы хада Иракли Хьынҭәба – 37-тәи атеатралтә сезон аартра дахцәажәеит: “Ҳара 37-тәи атеатралтә сезон Андреи Тимошенко иқәиргылаз аспектакль “Ревизор” ала иааҳартуеит. Аспектакль ҳгәазыҳәарақәа зегьы ирықәшәо имҩаҧысып ҳәа агәыҕра сымоуп. Жьҭаарамза 26, 27 рзы аспектакль “Ревизор” аҧхьарбара мҩаҧгахоит. Абилетқәа рыҭира бзианы имҩаҧысуеит.

Убри аан, арежиссиор Андреи Тимошенко иазгәеиҭеит: “Ҳара иааҳарҧшуа аҭоурых акыр аинтересс аҵаны иҟалоит, сара исоуз ааҧхьара гәахәара дула исыдыскылеит. Ари аспектакль атеатр аҩаӡара ахьынӡазҳаз унарбоит. Асиужет митәык уадаҩра шаҵамгьы, аспектакль мариахом. Ари асиужет ҳаамҭа иақәшәо, еилкаау абызшәа ала аиҭаҳәара алыршаразы арҿиаратә гәыҧи сареи оптималла иманшәалоу аформа алаҳхит. Ахәаҧшыҩ игәы ҳақәшәап ҳәа агәыҕра сымоуп".

Иара убас, Иракли Хьынҭәба иажәақәа рыла, Аҧсны акультуреи аҭоурыхтә-культуратә ҭынха ахьчаразы Аминистрреи Урыстәылатәи Афедерациа акультура Аминистрреи рыбжьара знапаҵыҩра мҩаҧгаз Аиқәшаҳаҭра инақәыршәаны, атеатр апрограмма “Агастроль дуқәа-2017” аҳәаақәа ирҭагӡаны Урыстәылаҟа агастроль ҳасабла амҩа иқәлоит. “Ҳара ҳтеатр аспектакльқәа “Ревизор”, “Братец кролик и братец лис” ала ақалақьқәа Пиатигорск, Елиста  иаҭаараны иҟоуп. Агастрольқәа абҵарамза 5 инаркны 14 рҟынӡа имҩаҧыслоит. Ари даара акыр зҵазкуа хҭысуп ҳара ҳзы. Сара Ельвира Анатоли-иҧҳа иҭабуп ҳәа ласҳәоит ҳара ҳтеатр азы хадара злоу аусшәҟәы анапаҵыҩра алыршаразы иҟалҵаз зегьы рзы. Ҳара урыстәылатәи ахәаҧшцәа ргәы ҳақәшәап ҳәа агәыҕра сымоуп”, – ҳәа иҳәеит Иракли Хьынҭәба.

Иара убас, аҳәынҭқарратә аурыс драматә театр анаҧхгаҩы хада иажәақәа рыла, жәабранмзазы атеатр ақалақь Санкт-Петербург Володинтәи афестиваль ахь аспектакль “Пять вечеров” ала рхы аладырхәраны иҟоуп.

Иракли Хьынҭәба 2018 шықәсазы иҟоу азҧхьагәаҭарақәа дрыхцәажәеит: “2018 шықәсатәи атеатралтә аамҭахәҭа апроект  Фиодор Достоевски иҩымҭа “Игрок” ала ихацыркхоит. Уи ҳара ҳтеатр актиорцәа реиҧш, раҧхьаҟа иартистцәаны иҟалараны иҟоу актиортә занааҭҵара иаҿу, Шьукин ихьӡ зху атеатралтә ҵараиурҭа астудентцәагьы злахәхо ароман аконцертә нагӡара акәхоит. Аспектакль ықәиргылоит арежиссиор Антон Киселиус. Иара убас, мшаҧымза анҵәамҭазы Артур Миллер ипиеса “Все мои сыновья” ала аспектакль ахәаҧшцәа ирыдгалахоит. Уи ҳаамҭазтәи трагедиоуп. Аспектакль ақәыргылаҩ Антон Киселиус. Аспектакль аҧхьарбара мшаҧымза анҵәамҭазы имҩаҧысраны иҟоуп. Рашәарамза азы ахәаҧшцәа ирыдгалахоит аспектакль “Широколобый”. Уи ароман “Сандро из Чегема”иахәҭакны иҟоуп.

Иракли Хьынҭәба зынагӡара азҧхьагәаҭоу апроектқәагьы дрылацәажәеит. Иаагозар, мшаҧымзазы иацҵахоит  иҳаҩсыз ашықәс азы ихацыркыз апроект “Шедевры московской сцены”. Уи ҳахәаҧшыҩ дзыршанхараны иҟоу хы-спектакльк роуп”, – ҳәа еизаз агәра диргеит Ф. Искандер ихьӡ зху аҳәынҭқарратә драматә театр анаҧхгаҩы хада Иракли Хьынҭәба.