Адунеизегьтәи аҧсуа-база жәлар Рконгресс ирынаҭо адгыларала Аӡҩыбжьа ақыҭан аҭыҧантәи ауааҧсыра апарк аиҭашьақәыргылара иаҿуп

Апарк аиҭашьақәыргылара азҧхьагәаҭоуп “Аӡҩыбжьа” Афонди, Адунеизегьтәи аҧсуа-база жәлар Рконгресси ирынаҭо адгыларала.

Аҟәа. Лаҵарамза 6. Аҧсныпресс. Аӡҩыбжьа ақыҭан аҭыҧантәи ауааҧсыра Адунеизегьтәи аҧсуа-база жәлар Рконгресс ирынаҭо адгыларала Дырмит Гәылиа ихьӡ зху апарк аиҭашьақәыргылара ахыркәшара азҧхьагәаҭаны ирымоуп. Абри атәы аанацҳауеит Адунеизегьтәи аҧсуа-база жәлар Рконгресс аофициалтә саит.

Ақыҭа актив ахаҭарнак, Аӡҩыбжьа ақыҭан иҟоу Адунеизегьтәи аҧсуа-база жәлар Рконгресс аҭыҧантәи аҟәша ахантәаҩы Алхас Кациа иҟаиҵаз адыррақәа рыла, Афонд “Аӡҩыбжьа” ахарџь ала апарк атерриториа аиҭашьақәыргылара иалагеижьҭеи шықәсқәак ҵуеит. Уи иажәақәа рыла, Афонд алахәылацәас иҟалеит ақыҭа аҧсҭазаара активла зхы алазырхәа гәыҧҩык, аусдкылаҩцәа, арҵаҩцәа, уҳәа ақыҭа иалҵыз аӡәырҩы. Афонд аусура ахырхарҭа хадақәа иреиуоуп – асоциалтә инфраструктура аҿиара, аспорт аӡыргара, аҿар аспорт ахь ралагалара, иааизакны, ақыҭаҿы аспорттә зкызаара аҧҵара, аспорттә потенциал арҿиара.

Алхас Кациа апарк аҿы аиҭашьақәыргыларатә усурақәа рымҩаҧгара  атәы еиҭеиҳәеит: “Афонд ахарџь ала, ақыҭа аҿар рыцхыраарала, апарк аҿы арлашаратә усурақәа нагӡоуп, анапылампылтә плошьадка ҟаҵоуп. 2017-шықәса  анҵәамҭаз ҳара ҳхықәкы хада анагӡара – ашьапылампыл маҷ азы аплошьадка аргылара нап аҳаркит. 2019-шықәса анҵәамҭазы ари ашьапылампыл маҷ адәы аргылара хыркәшан. Уи Асовет Еидгыла зҽаҧсазтәыз аспорт азҟаза, ҳара ҳқыҭа иалҵыз Владимир Маан ихьӡ ахыуп”. 

Алхас Кациа иҟаиҵаз адыррақәа рыла, Адунеизегьтәи аҧсуа-база жәлар Рконгресс апарк аҭеиҭыҧш арҽеира азы апроект адгалара мҩаҧнагеит. “Агәыӷра ҳамоуп Аконгресс аринахысгьы адгылара ҳанаҭалап ҳәа. 2020 шықәсазы ҳара ҳаамҭазтәи ахәыҷтәы плошьадка аргылара азҧхьагәаҭаны иҳамоуп”, – ҳәа иажәа хыркәшо иҳәеит Алхас Кациа.