Агазеҭ «Аԥсны» аколлектив аигәырӷьеит аредактор хада ҿыц урҭ аус рыцызуа рхыԥхьаӡара аҟынтәи дахьыҟаҵоу

Аԥыза-министр актәи ихаҭыԥуаҩ Индира Аҩардан агазеҭ «Аԥсны» аколлектив дыдлырдырит аредактор хада ҿыц Владимир Қапба.

Аԥсуа газеҭ аредакторс Владимир Қапба иҟаҵаразы ақәҵара аԥыза-министр Леонид Лакербаиа инапы аҵаиҩит абҵарамза 23 рзы. Владимир Қапба иара убасгьы Аԥсны Ажурналистцәа Реидгыла ахантәаҩыс дыҟоуп.

«Владимир Қапба шәара акыр аамҭа аус шәыциуеит. Уи дпублициступ, зус бзианы издыруа уаҩуп. Агәраганы сыҟоуп шәара ишшәзыманшәалахо аус ицура, избанзар уи даара ибзианы идыруеит ишәымоу ауадаҩрақәа, рыӡбашьагьы дақәшәоит», - лҳәеит Аҩардан агазеҭ аколлектив данырԥылоз. Уи лажәақәа рыла анапхгаҩы иагьа адырра ҵаула, аԥышәа имазаргьы аколлектив идымгылар иусураҿы алҵшәа бзиақәа зыҟалом.

Уи аамҭазы аԥыза-министр актәи ихаҭыԥуаҩ агазеҭ аредакторс иҟаз Борис Ҭыжәба иҭабуп ҳәа иалҳәеит, уи лажәақәа рыла иара акры шықәсы рыҩнуҵҟа қәҿиарала анапхгара азиуан.

«Агазеҭ «Аԥсны» авторитет есымша иҳаракны. Ари атәыла анапгхара ркьыԥхьтә органуп, аха «Аԥсны»- жәлар ргазеҭ ауп, уа иаарԥшызароуп ажәлар рыԥсҭазаара, урҭ рыпроблемақәа, реихьӡарақәа,- лҳәеит Индира Аҩардан.- Ҳтәылаҿы агазеҭқәа рацәоуп, аха урҭ рыбжьара иҟоуп цәгьарада егьыҟамшәа атәылаҿы уаҳа акгьы змыҩуа. Агазеҭ «Аԥсны» апроблемақәа ирылацәажәо есымша иазааҭгылон аихьӡарақәа, ауадаҩрақәа рыӡбаразы иҟаҵатәу ашьаҿақәа аннаҵон».

Аԥыза-министр актәи ихаҭыԥуаҩ дшақәгәӷуа лҳәеит агазеҭ аусзуҩцәа ирылшо зегь шыҟарҵо агазеҭ аҳаҭыр ашьҭыхразы.Уи агәра длыргеит атәыла анапхгара аматериалтә-техникатә база аиӷьтәразы ацхыраара шыҟанаҵо.

Индира аҩардан аредактор хада ҿыц ақәҿирақәа изеиӷьалшьеит иусураҿы.

«Ҳара ҳгазет ҳтәылазы аҭоурыхи аҵак дуи амоуп,- иҳәеит Борис Ҭыжәба.- мызки бжаки раԥхьа аусура ааныжьразы арзаҳал анызҩы ашьҭахь атәыла аиҳабыра ахантәаҩы саниҿцәажәоз ҩ-кандидатурак рыхьӡ сҳәеит аколлеектив ргәаанагара еилкааны. Сара иҭабуп ҳәа расҳәоит ҳара ҳгәаанагара рыдкыланы аредактор ҿыц аколлектив ахыԥхьаӡара аҟынтәи дахьалырхыз. Агазеҭ аус ззымдуруа ауҩ ҿыц изы иуадаҩхон уи ацҵара».

Уааанӡа редакторс иҟаз арадактор ҿыц изеиӷьешьеит ақәҿиарақәа, иара убасгьы дышгәӷуа иҳәеит жәлар ргазеҭ еиҳагьы шеиӷьхо ала.

Владимир Қапба иҭабуп ҳәа реиҳәеит иҳаракны ихә ахьыршьаз, иагьазгәеиҭеит агазеҭ аҿы апроблемақәа шмаҷым. Аха ари аколлектив аҿы аус зуеижьҭеи ҩажәижәаба шықәса ҵуеит, сгыӷуеит иҳалшо зегь шыҟаҳҵо аусура аиӷьтәразы,- иҳәеит иара.