Александр Анқәаб Аҟәа зыргылара иаҿу ахыбрақәа дырҭааит.

Иҳаҩсыз аԥсшьарамшқәа раан Александр Анқәаб Аҟәа зыргылара иаҿу ахыбрақәа дырҭааит. Аҳәынҭқарра ахада дицын Аҟәа ақалақь ахада Алиас Лабахәуа.

Раԥхьа Александр Анқәаб даҭааит Аҟәа араион Учхоз аҳаблаҿы зыргылара иаҿу ашьапылампылтә дәы. Уажәы уаҟа ахыркәшаратә усурақәа ирҿуп.

Астадион ихыбу атрибуна 500-ҩык ауааԥсыра акуеит.

Аҳәынҭқарра ахада уаҟа дрыҿцәажәеит аҟәатәи «Абазг» ашьапылампыл асыҩцәа, урҭ астадион даараӡа иргәаԥхоит.

Анаҩс Александр Анқәаб Аладатәи Ешыра ақыҭа даҭааит, уаҟа ашьапылампыли, амҵәышәмпыли, анапылампыли рзы адәқәа рыргылара иаҿуп. Урҭ рыргылара хымз рыла ихыркәшахоит. Аҭыԥантәи ауааԥсыра урҭ адәқәа иреигәырӷьоит, урҭ ражәақәа рыла аҿар рзы ишхәарҭахоу рдыруеит.

Аҳәынҭқарра ахада Аҳабла ҿыци Алашарбага аҳаблеи еидызҳәалоу амҩаду дахәаԥшит. Аҳәынҭқарратә еилакы ахада Максим Харчлаа аҳәынҭқарра ахада изеиҭеиҳәеит имҩаԥгаз аусурақәа ртәы.

Иара убри аҽны Александр Анқәаб Аҳабла ҿыц аҿы зыргылара иаҿу ахәыҷтәи ашьапылампылтәи дәқәа дырҭааит.

Иара убасгьы аҳәынҭқарра ахад даҭааит Ахабла жәытә аҿы зыргылара иаҿу ахәыҷбаҳча. Аҭыԥантәи аауаԥсыра ирҳәеит ахәыҷбаҳча аҵак ду шамоу. Ари аҳаблаҿы ихыркәшоуп хәыҷбаҳчак аргырала, аха уаҟа 40-ҩык рҭыԥ ауп иҟоу, аха зхәыҷқәа ахәычбаҳчахь изышьҭырц зҭаху акыр еиҳауп.

Александр Анқәаб Алиас Лабахәуа идиҵеит ахәыҷбаҳча аргылара алагаразы адокументқәа дырхиарц.

Абри атәы аанацҳауеит Аҳәынҭқарра ахада иҿы иҟоу Аинформациатә усбарҭа.