Аурыстә-аԥсуа ҳәааҿы ацҳа ҿыц аадыртит

Аурыс-аԥсуа ҳәааҿы ацҳа ҿыц аадыртит. Уи ҩ-ганктәи амашьынамҩатә цҳауп. Ацҳа аганқәа руак аҿы ауааԥсыара рзы аиасырҭатә ҭыԥ азгәаҭоуп.
Ажәытәтәи амшьынымҩатә цҳа макьана аус аулоит, аха ԥыҭрак ашьҭахь, иҟалап ааԥын, уи адыркуеит аиҭашьақәыргылатә усурқәа рымҩаԥгаразы,- ааицҳаит ҭелла «Аԥсныпресс» акорреспондент.
Иахьа Урыстәылатәи Афедерациеи Аԥсны Аҳәынҭқарреи рхадацәа Дмитри Медведеви Александр Анқәаби ацҳа ҿыц иахәаԥшит. Урыстәыла ахада аурыс-аԥсуатә ҳәаахь ихатә машьынала днеит, аԥсҟа зкызгьы иара иакәын.
Аҳәынҭқаррақәа рхадацәа аҳәаа ахысра шымҩаԥысуа атәы иалацәажәеит, еиҳарак аԥхынтә аамҭазы. Анқәаби Медведеви иазгәарҭеит ацҳа ҿыц анаартха ашьҭахь аҭагылазаашьа шеиӷьхо.
Александр Анқәаб урыстәылатәи аргылаҩцәа иҭабуп ҳәа реиҳәеит рус аҩаӡара ҳаракны иахьынарыгӡаз азы. Аӡиас Ԥсоу аҿы ацҳа аргылара иаҿын шықәсыки бжаки.
Уи ашьҭахь Медведеви Анқәаби аурыстә ҳәаа ахь ицеит атерминал аҿы иахәаԥшырц азы. Уи атехника ҳаракы ала еиқәыршәоу аушьҭырҭатә ҭыԥ ауп.
Аԥсуа ган ала аушьҭырҭатә ҭыԥ аргылара макьана иаҿуп. «Ҳара ҳаушьҭырҭатә ҭыԥ аадыртаанӡа аидара змоу амашьынақәа агәаҭаразы ажәытәтәи ажрахь илбаалоит»,- Аԥсны акорреспондент иеиҳәеит Аԥсы Аҳәынҭқарратә аҳазылхратә еилакы ахантәаҩы Саид Ҭаркьыл.
Урыстәылатәи Афедерациа ахада ицын Урыстәыла адәныҟатәи аусқәа рминистр Сергеи Лаврови Краснодартәи атәылаҿацә ахада Александр Ткачеви.