Едита Аҵнариа: aинформациатә-координациатә центр аусура аҳәаақәа ирҭагӡаны аинформациа аизгара, аоперативтә-ҧшааратә уснагӡара иаҵанакӡом

Астолгьежь аҿы Аҧсны Аҳәынҭқарреи Урыстәылатәи Афедерациеи рыбжьара Аиқәшаҳаҭра апроекти аҩганктәи аҩныҵҟатәи аусқәа русбарҭақәа ирзеиҧшу Аинформациатә-координациатә центр азы Аҧҟареи ирылацәажәеит.

Аҟәа. Жьҭаарамза 12. Аҧсныпресс. Дырмит Басариа. Аҧсны амассатә информациатә ахархәагақәа русзуҩцәа Рассоциациа аплошьадка аҿы астолгьежь мҩаҧган. Уи алахәылацәа Аҧсны Аҳәынҭқарреи Урыстәылатәи Афедерациеи рыбжьара Аиқәшаҳаҭра апроекти аҩганктәи аҩныҵҟатәи аусқәа русбарҭақәа ирзеиҧшу Аинформациатә-координациатә центр азы Аҧҟареи ирылацәажәеит.

Аилатәара иалахәхеит Аҧсны аҩныҵҟатәи аусқәа рминистр ихаҭыҧуаҩ – аҳәынҭқарратә маӡаныҟәгаҩ Едита Аҵнариа, азиндырҩы Алхас Асланӡиа, уаанӡатәи апрокурор хада Алеқсеи Ломиа, Аҧсны алхратә комиссиа Хада Баҭал Тапаҕәуа.

Аилацәажәара иалагӡаны Едита Аҵнариа ишазгәалҭаз ала, урыстәылатәи аган зыдгалара мҩаҧнагаз Аинформациатә-координациатә центр раҧхьаӡатәи апроект ахықәки азинмчи мыцхәы ирҭбаан. Аха уи аус адулара ашьҭахь, акыр аиҭакрақәа алагалан. Аҵыхәтәаны, аҧсуа ган еиқәнаршәаз авариант урыстәылатәи аган аҟынтәи ақәшаҳаҭра аиуит. Уажәы иарбоу апроект ахәаҧшреи ашьақәырҕәҕәареи рзы Аҧсны апарламент аҿы иҟоуп. “Аус зыдулаз авариант ала, иарбоу Ацентр аусзуҩцәа рзинмчи аштаттә амшеизшеи аиҭакрақәеи ацҵақәеи алагалан. Аҧсуа ган еиқәнаршәаз апроект авариант ала, ацентр аинформациа аизгареи аус адулареи аизакреи мҩаҧнагалоит. Убри аан, аинформациа аизгара аоперативтә-ҧшааратә уснагӡара иаҵанакӡом, избан акәзар, уи аиҧш зеиҧшу аусура Аҧсны Аҳәынҭқарра иахьаҵанакуа иҳәаақәызҵо Азакәан еиланагоит”, – ҳәа инаҵшьны иазгәалҭеит лара.

Аинформациатә-координациатә центр аҧҵаразы Аиқәшаҳаҭра хра злоу аганқәа алкаауа, Ельвира Аҵнариа иазгәалҭеит: “Аҧсуа ган Аинформациатә-координациатә Центр абзоурала аинформациа аимадара арманшәалоит ҳәа иақәгәыҕуеит. Уажәазы, ари апроцедура анагӡара аамҭа рацәаны иагоит. Уи иахҟьаны лассы-лассы аусеилыргара иазыҧҵәоу аамҭа изалагӡахом”.

Убри аан, Баҭал Тапаҕәуа иазгәеиҭеит: “Аинформациатә-координациатә центр аинформациа аимадара иадҳәалоу апроцесс арласра шзалмыршахо агәра ганы сыҟоуп. Убри азы урыстәылатәи аган азакәанҧҵара иарбоу Аиқәшаҳаҭра иақәшәо иҟалартә еиҧш аиҭакрақәа аланагар акәхоит”.

Баҭал Тапаҕәуа Аинформациатә-координациатә Центр аҧҵаразы ихатә гәаанагара иҳәеит: “Сара ари Аиқәшаҳаҭра аҿы иҽеим ҳәа акгьы збом. Аха хра злоугьы акгьы ыҟам. Аҧсни Урыстәылеи рыбжьара аиҧш-зеиҧшу аиқәшаҳаҭрақәа, Аиқәшаҳаҭра ду аҳәаақәа ирҭагӡаны уаанӡагьы аус руан. Иарбоу Аинформациатә-координациатә центр бзиара заҵәык аманы иҟоуп, уи 10-ҩык рҟынӡа усуратә ҭыҧла реиқәыршәаразы алшара ҳанаҭоит, аха убри аан, уи аполитикатә еилаҩеиласра дуқәа ршәарҭара ацуп.

Ахәҭакахьала, Алеқсеи Ломиа, “Аинформациатә-координациатә центр аҧҵаразы Аиқәшаҳаҭра Аҧсны ахьыҧшымразы шәарҭарак аҵаны иҟаӡам” ҳәа азгәеиҭеит. "Аскептикцәа иарбоу ацентр аҵакы ииашаны аилкааразы азинхьчаратә усура инарҵауланы ирдыруазар ахәҭоуп. Сара сгәаанагарала, ацентр Аҧсни Урыстәылеи рзинхьчаратә усбарҭақәа еимыздо цҳаны иҟалои", – ҳәа иҳәеит иара.

Уи игәаанагара дадгылеит Алхас Асланӡиагьы: “Аинформациатә-координациатә центр Аҧсни Урыстәылеи рыбжьара, ус уҳәар ауазар, Аинтерпол маҷ ҳасабла аус аулоит” Аха уи, иара убасгьы иазгәеиҭеит: “Сара уеизгьы ари ацентр аҧҵара ҵаҵҕәыс имоу инагӡаны аилкаара сцәыуадаҩуп. Иҟоу аиқәшаҳаҭрақәа рҳәаақәа ирҭагӡаны аинформациатә-координациатә усура иацаҳҵар алшоит. Еилкаауп, аинформациатә- координациатә центр аҧҵара, урыстәылатәи аган аамҭала, мамзаргьы есымша Аҧсны иқәынхо Урыстәыла атәылауаа ршәарҭадаразы хәдықәҵарак аҳасабала иахәаҧшуеит. Уи аиашазы жәларбжьаратәи аизыҟазаашьақәа рҿы лассы-лассы иуҧыло ҧышәоуп”.