Ельвира Арсалиаԥҳа Авангард Леонтиев длыдылкылеит

Аҧсны акультуреи аҭоурыхтә-культуратә ҭынхақәа рыхьчареи аминистр Ельвира Арсалиаԥҳа Урыстәылатәи Афедерациа Жәлар рартист Авангард Леонтиев длыдылкылеит.

Аҟәа. Ҧхынҷкәын 9. Аҧсныпресс. Лана Ҵәыџьҧҳа. Урыстәылатәи Афедерациа Жәлар рартист Авангард Леонтиев бзиала уаабеит ҳәа иаҳәо, Аҧсны акультуреи аҭоурыхтә-культуратә ҭынхақәа рыхьчареи аминистр Ельвира Арасалиаԥҳа, аҧснытәи ахәаҧшцәа уи бзиа дшырбо, насгьы ифильмографиақәа рыла шьахәлаҵәҟьа дшырдыруа азгәалҭеит. “Ҳара, Шәара иахьа Аҧсныҟа шәаара даара гәахәарыла иҳадаҳкылоит, избан акәзар, аҧснытәи ауаажәларратә еилазаара аҧсҭазаараҿы акультуреи аҟазареи иҷыдоу аҭыҧ ааныркылоит”, – ҳәа инаҵшьны иазгәалҭеит Ельвира Арсалиаҧҳа.

Уи иара убас, лажәа иацҵо, Авангард Леонтиев амоноспектакль “Наше все… Фазиль Искандер” Аҧснытәи асценаҿы инаигӡараны дшыҟоу азгәалҭеит: “Ҳара иахьатәи ахәылҧаз ҳгәы хыҭ-хыҭуа ҳазыҧшуп. Фазиль Абдул-иҧа аметафизикатә Аҧсны аҧҵаҩны дшыҧхьаӡоу ала, шәара шәзы, акультуратә гьама зцәа-зжьы иалоу уаҩык иаҳасабала, арахь шәаара, Искандер ирҿиамҭақәа рҕьырак рҿы дызлацәажәо амҩақәеи ауааи рбара акыр агәахәара шәызцәырнагоит ҳәа агәра ганы сыҟоуп”.

Ахәҭакахьала, Авангард Леонтиев ишеиҭеиҳәаз ала, абар хынтәуп уи Аҧсныҟа даауеижьҭеи. "90-тәи ашықәсқәа рынҵәамҭаз сара Фазиль Абдул-иҧа Искандер сицны Аҧсныҟа сааит. Уи усҟан, араҟа арҿиаратә хәылҧазы мҩаҧигон, сара уи мҩаҧызгон, ажәабжь “Начало” аҟынтәи ацыҧҵәаха саҧхьон. Сара Фазиль Искандер Урыстәыла ҳара бзиа дшаабо аасҭа еиҵамкәа, Аҧсныгьы уи бзиа дшырбо шьахәлаҵәҟьа иубаратәы иҟан. Ҳара уи иҳәааданы илаз ауаҩреи аҟыбаҩ ҷыдеи рзы даара бзиа даабоит!” – ҳәа иҳәеит Авангард Леонтиев.

(АП): Иахьа, ҧхынҷкәын 9 рзы, аурыс драматә театр асценаҿы Урыстәылатәи Афедерациа Жәлар рартист Авангард Леонтиев амоноспектакль “Наше все… Фазиль Искандер“ ала дықәгылоит.