Гәдоуҭа араион ақыҭақәа рҿы аӡымҩангага шьақәдыргылоит

Гәдоҭа араион аҿы аинвестициатә программа аҳәаақәа ирҭагӡаны имҩаҧгаз аусурақәа реихшьаала ҟарҵоит.

Аҟәа. Жьҭаарамза 24. Аҧсныпресс. Дамеи Касланӡиа. Аинвестициатә программа аҳәаақәа ирҭагӡаны Гәдоуҭа араион ақыҭақәа рҿы аӡымҩангагақәа рышьҭаҵара иадҳәалоу аусурақәа мҩаҧысуеит. Ӡыла аиқәыршәара еиҿкаахоит ақыҭақәа Дәрыҧшь, Мгәыӡырхәа, Жәандәрыҧшь, Ҟәланырхәа, Абҕархәык рҿы. Абри атәы аарыцҳауеит аобиектқәа ирҭааз анардкыларатә еиҿкаарақәа рхаҭарнакцәа.

Аҟәатәи аргыларатә фирма “Профмастер” аиҳабы Алексеи Квасиа Абҕархәык ақыҭаҿы аусурақәа рымҩаҧысшьа атәы дазааҭгылеит: "Ҳара 4 километрак рҟынӡа инаӡо ихадоу аӡымҩангага Абҕархықә ақыҭан иҟоу аӡеизакырҭа аҟынтәи Ҟәланырхәа ақыҭанӡа инаҳгоит. Аусурақәа ҧхынҷкәынмзазы рхыркәшара азҧхьагәаҭаны иҳамоуп. 2018 шықәсазы иарбоу аӡымҩангага аҟынтәи ахатәы ҩнқәа рҟынӡа рнагара ҳалагоит. Асовет аамҭа инаркны ақыҭақәа аӡы роуан Абҕархәык ақыҭаҿы иҟоу аӡеизакырҭа аҟынтәи. Уи аибашьра ашьҭахьтәи аамҭа инаркны аус ауӡом. Аха уажәы иарбоу аӡеизакырҭа еиҭашьақәыргылоуп, аусгьы ауеит.



Алексеи Квасия иҟаиҵаз адыррақәа рыла, Дәрыҧшьынтәи Мгәыӡырхәанӡагьы аӡымҩангага нагахоит, уажәтәи аамҭазы Џьырхәа ақыҭангьы аусурақәа мҩаҧысуеит. Ҳара аҭакҧхықәра ду ҳадуп, аусурақәагьы аамҭа кьаҿ иалагӡаны ахаҭабзиарагьы ҳаракны иҟаҳҵоит”, – ҳәа иҳәеит.

Убри аан, Абҕарҕархықә ақыҭа аҿы инхо Лиосик Колҕьы  аҭагылазаашьа далацәажәеит: “Ҳара ӡыла аиқәыршәара иадҳәаланы имаҷымкәа ауадаҩрақәа ҳамоуп, уи аахәарагьы ҳақәшәоит, реиск азы 2 нызықь мааҭ ҳшәоит. Ауаҩы ӡыла деиқәыршәазар, имҩа бзиазар, алашара имазар, уаҳа ииҭаху арбану! Аусурақәа рхыркәшара ҳара ҳзы даара гәырҕьара дуухоит”.



Афирма “АкваСпецСтрой” аусзуҩцәа реиҳабы Славик Агрба Ҟәланырхәа ақыҭан имҩаҧысуа аусурақәа дрыхцәажәеит: Ақыҭаҿы иҿыцу аӡымҩангагала иҭырҭәаахо 2 ӡҭарчык жтәуп. Анаҩс урҭ рҟынтәи ҳара аӡымҩангага шьҭаҵаны аҵеиџьқәа ҳаргылоит. Уаантәи анхацәа аӡы роуртә иҟалоит. Арҭ аусурақәа ирықәхарџьхо аҧара 22 миллион мааҭ рҟынӡа инаӡоит”.