Рауль Ҳаџьымба: Астратегиа аус адызулоз ражәалагалақәа рынагӡаразы амҩақәҵагақәа рыдгалара мҩаҧыргап ҳәа агәыҕра сымоуп

“Евразиатәи аинтеграциатә процессқәа иадҳәаланы Аҧсны аҿиара Астратегиа” ҳәа Жәларбжьаратәи афорум аатит.

Аҟәа. Декбр 16. Аҧсныпресс. Елена Полуиан. Афорум аҿы 300-ҩык инареиҳаны алахәылацәа еизеит. Аҧсны аҿиара Астратегиа алацәажәара ахь ааҧхьара рыман Аҳәынҭқарра Ахада, атәыла анаҧхгара, ақалақьқәа, араионқәа, ақыҭақәа рхадацәа, ауаажәларратәи аполитикатәи аусзуҩцәа, анаукатә уаажәларра, иара убас Урыстәылеи Нхыҵ Кавкази рҟынтәи иааз аексперттә делегациа.

Афорум аартуа, Аҧсны Ахада иҟны иҟоу астратегиатә ҭҵаарақәа Рцентр, аиҳабы, апроект анаҧхгаҩы Олег Дамениа иазгәеиҭеит: “Афорум иамоу, ас еиҧш иҳараку ахаҭарнакра машәыршақә иҟамлеит. Ҳара, азныказы имариоуп ҳәа ҳгәы иаанаго азҵаара “иарбан иаҳҭаху?” зегьы ирбо, ираҳауа иаартны аҭак ҟаҳҵароуп. Аҭакгьы мариоуп: еиҳа еиҕьны анхара ҳҭахуп! Аха, убри аан, еилаҳкаауоу, ҳара еиҕьу аҧсҭазаара ҳәа иҟоу аилкаара ххаҿы нагашьас иаҳҭо, уи азы иҟаҳҵараны иҟоуи, иҳалшоуи, насгьы, зегьы ирыцку, Аҧсны аҧсҭазаара еиҕьхарц азы ҳара хықәкыла аҽеиҿкаара ҳазхиоу, ҳазхиаму? Иахьа зыдгалара мҩаҧгахо Астратегиа арҭ азҵаарақәа зегьы рҭак ҟанаҵоит. Шәара, уи азы ишәымоу агәаанагареи, аҧсадгьыл аиҭарҿиара иадҳәалоу апроцессқәа рылахәраҿы ишәымоу аилкаара, ҳара ҳзы даара акыр аҵанакуеит. Ҳара, иара убас, ҳаҭыр зқәу ҳасас даҕьқәа ргәаанагареи, иҟарҵо алкаақәеи ҳрызҿлымҳауп”.

Аусшәҟәы аҧҵара ахымҧадатәреи уи актуалреи инаҵшьны иазгәеиҭеит Аҳәынҭқарра Ахада Рауль Ҳаџьымба: “Ауаажәларратә ҧсҭазаара еиуеиҧшым ахырҳарҭақәа рыла, зегь раҧхьаӡа иргыланы, асоциал-економикатә ҿиара иадҳәаланы астратегиатә усшәҟәқәа аус рыдулареи реиқәыршәареи ихымҧадатәиу рҭахра аҭыҧ амоуижьҭеи акрааҵуеит. Шықәсырацәа инеиҧынкыланы ҳҳәынҭқарра аҧсҭазаара изеиҧшразаалак аконцепциатә усшәҟәқәеи астратегиатә хәаҧшрақәеи ирықәшәо иҟамызт. Убри аан, зхаҭабзиара ҳаракны еиҿкаау астратегиатә планҟаҵарада ашықәсырацәа зымҽханакуа асоциал-економикатә ҿиаратә политика анагӡара шзалмыршахо еилкаауп. Аҧхьаҟатәи аҧеиҧш азеиҧш лаҧшҳәаа умбо есымша акылҳарақәа рыџьгәарала ашьақәгылара зыҟалом”. Убри аан, Аҳәынҭқарра Ахада, “аҧыжәара змоу хырхарҭақәак алкаауп”, ҳәа адырра ҟаҵо, аҳәынҭқарра ашьақәгылара аҿы ареформақәа ралагалара хадара злоу ахырхарҭақәа дырзааҭгылеит.

Рауль Ҳаџьымьа иазгәеиҭеит: “Астратегиа – Иҧшьоу Ҩыраӡам, иҧшьоу апостулатқәеи адогмақәеи реизга акәӡам. Ҳара, атактикатә ҟазшьа змоу азҵаарақәа рыдагьы, иҟоу аконцептуалтә моментқәагьы аиҭакрақәа ралагалараан иҵару азнеишьа аарҧшра хымҧада ҳазхиазароуп. Астратегиа аус адызуло, аамҭа кьаҿ иалагӡаны еиуеиҧшым аекономикатә усхкқәа, ражәалагалақәа рынагӡара азы иашьашәалоу амҩақәҵагақәа, уҳәа рыдгалара мҩаҧыргап ҳәа агәыҕра сымоуп. Аҳәынҭқарра Ахада иажәақәа рыла, иазҧхьагәыҭоу ауснагӡатәқәа рымҩаҧгаразы, иашьашәалоу “амшахәаҧштә” еиқәыршәатәуп.

Аҳәынҭқарра Ахада, излацәажәо аусшәҟәа ареспублика аҿы еиуеиҧшым аҩаӡарақәа рҿы ахәаҧшреи аҭҵаареи ишахысыз еизаз иргәалаиршәеит: “Ҳара ҳақалақьқәа, ҳраионқәа, ҳқыҭақәа рҿы ари аусшәҟәы адгалара анымҩаҧысуаз, ауаа уи азы ирымаз агәаанагара збон. Астратегиа алацәажәара хыҧхьаӡара рацәала ауаа рхы аладырхәон, избан акәзар, уи урҭ уаҵәтәи рҧеиҧш иузаҟәымҭхо иадҳәалоуп”. Шәааи, ҳамчқәа неилаҵаны ҧхьаҟатәи ҳҧеиҧш ауасхыр ашьҭаҳҵара ҳалагап! “, – ҳәа иҳәеит Рауль Ҳаџьымба.

Аҧсны иҟоу Урыстәылатәи Афедерациа Ацҳаражәҳәаҩ Семион Григориев инаҵшьны иазгәеиҭеит: Аҧсни Урыстәылеи, ас еиҧш Астратегиа аҧҵара есымшагьы акыр ахшыҩзышьҭра арҭон. Ари аусшәҟәы иахьа аконсолидациатә цәаҩа аманы иахьаабо, даара ишьахәуп. Ҳазҭоу аамҭазы, аусеицуреи астратегиатә еиҩызареи рзы Аиқәшаҳаҭра инақәыршәаны, аетап ҿыц ахь ицәырҵуа Аҧсни Урыстәылеи ирыбжьоу аимабзиаратә еизыҟазаашьақәа рзы Астратегиа инанагӡо ароль ахәа ашьара уадаҩуп”.

Аусшәҟәы аексперттә хәшьара аҭара аламҭалазы, арегионалтә економикатә интеграциа азҵаарақәа рзы Урыстәылатәи Афедерациа Апрезидент ибжьагаҩ Сергеи Глазиев иҳәеит: “Ҳара ҳделегациа азы ас еиҧш аусшәҟәы алацәажәара уи аҵакытәи апрофессионалтәи рганахьала ахшыҩзышьҭра аҳҭоит. Ҳара Урыстәылагьы астратегиатә ҧланҟаҵара мҩаҧаагоит. Астратегиа Аҧсни Урыстәылеи реимабзиаратә еизыҟазаашьақәа рырҕәҕәара иахьадҳәалоу даара акыр аҵанакуеит. Иахьатәи аусмҩаҧгатә аҿы ҳара ҳроль – Асратегиа аҿы иазҧхьагәыҭоу ахықәқәа рынагӡара шымҩаҧгатәу азхәыцреи, анаҩс аҳәынҭқаррабжьаратәи аизыҟазаашьақәа рформат аҿы ахцәажәара заураны иҟоу аекономикатә механизмқәа ирыдҳәалоу абжьгаларақәеи еффективла ахархәареи алыршара ҳахшыҩ еилаҵаны азхәыцреи”.

“Ари аусмҩаҧгатә аусеицура ахыҵхырҭоуп!”, – ҳәа инаҵшьны иазгәеиҭеит Сергеи Глазиев.