Занҭариа: аҭынчра, аҭышәынтәалара, ажәлар ракзаара – хаҭалатәи аинтересқәа зегь раасҭа ихадоуп

Аҟәа ақалақь аҿы Ареспубликатә Уаажәларратә Еиҿкаара “Аруаа” активистцәа реизара мҩаҧысит. Аусмҩаҧгатә иара убас рхы аладырхәит Ареспубликатә Политикатә партиа “Ажәлар Ракзаара Афорум” ахаҭарнакцәа, ауаажәларратәии аполитикатәии аусзуҩцәа, Жәлар Реизара-Апарламент адепутатцәа.

Аҟәа. Абҵарамза 30. Аҧсныпресс. Еизаз рҿаҧхьа дықәгыло аҭҵаареи, акультуреи аҵарадырреи рзы Аҧсны Ахада иабжьгаҩ Владимир Занҭариа, иахьа Аҧсны акыр иуадаҩу, аибарххара зныҧшуа, ауаажәларра-политикатә ҭагылазаашьа шьақәгылеит ҳәа азгәеиҭеит.

“Уи еиуеиҧшым аобиективтәи асубиективтәи амзызқәа амоуп. Аха хшыҩла ихәыцуа, ахшыҩ зҵоу ахымҩаҧгашьа змоу амчқәа зегьы, иҟоу аполитикатә еиҿагылара аҭышәынтәалара атәыла анаҧхгареи аоппозициеи рыбжьара аконструктивра злоу адиалог амҩаҧгарала мацара иалыршахоит ҳәа еицҿакны агәаанагара рымоуп. Агәра ганы сыҟоуп, иҟоу аполитикатә мчрақәа зегьы рзы, аоппозициатә партиақәагьы уахь иналаҵаны, аҭынчра, аҭышәынтәалара, ажәлар ракзаара – хаҭалатәи аинтересқәеи амбициақәеи раасҭа ихадоуп”, – ҳәа инаҵшьны иазгәеиҭеит Владимир Занҭариа.

Владимир Занҭариа иажәақәа рыла, асоциал-економикатә хырхарҭаҿы иҟоу, хра злоу аиҭакрақәа, Аҧсни Урыстәылеи ирыбжьоу аимабзиаратә еизыҟазаашьақәа рыҿиара, аконституциатә реформақәа рымҩаҧгара, уҳәа аиҭакрақәа умбар залшом. Убри аан, иара ихадоу азҵаарақәа рхыҧхьаӡараҿы иаликааит ауаажәларратә еилазаара агәҭынчымра рызцәырызго акоррупциеи иуадаҩу акриминагентә ҭагылазаашьеи ирыдҳәалоу азҵаарақәа. Убри аан, уи игәаанагарала: “Аҳәынҭқарра Ахадеи атәыла Анаҧхгареи Жәлар Реизареи ари ахырхарҭала рҽазышәарақәа, ацәгьоурақәа рҿагылара, алҵшәа бзиақәа шаанаарҧшуа агәра удыргоит”.

Аҳәынҭқарра Ахада иабжьгаҩ ишазгәеиҭаз ала, имҩаҧысраны иҟоу аҩ-ҳәынҭқаррак Рхадацәа реиҧылара акыр агәыҕра адырҳәалоуп. “Ари аиҧылара Аҧсны аҳәынҭқарреи Урыстәылатәи Афедерациеи ирыбжьарҵаз аусеицуреи астратегиатә еиҩызареи рзы Аиқәшаҳаҭра анагӡара аҿы иҿыцу алшарақәа рцәыргара иазырхахоит ҳәа агәра ганы ҳаҟоуп”, – ҳәа инаҵшьны иазгәеиҭеит Аҧсны Ахада иабжьгаҩ Владимир Занҭариа.