Аҿцәажәара

Цәыббра 12, Аԥснытәи АССР аҟазара зҽаԥсазтәыз, Д. Гәлиа ихьӡ зху апремиа алауреат, Аԥсны жәлар рартист Ражден Гәымба диижьҭеи 90 шықәса ҵит.

Аҟәа. Цәыббра 12. Аԥсныпресс. Саид Џьарсалиа. Убри инамаданы, Аԥсны зҽаԥсазтәыз артист, Леон иорден акавалер, “Ахьӡ-Аԥша” аорден III аҩаӡара занашьоу, акомпозитор Тото Аџьапуа, Ражден Гәымба изку игәалашәарақәа ртәы “Аԥсныпресс” акорреспондент изеиҭеиҳәеит.

"Ражден Гәымба аԥсуа қыҭа дааӡеит, аԥсуара дагәылиааит ҳәа уҳәар алшоит. Иара ииҩуаз ашәақәа зегьы, ажәлар рашәақәа шьаҭас ирыман”,– ҳәа иҳәеит Тото Аџьапуа.

Уи иажәақәа рыла, дазусҭзаалак рҵаҩык, ауаҩы ашәа аҩышьа ирҵара илшараны дыҟаӡам, “ашәа узырыҩуа, ааӡара иуоузи, аԥсабара иунаҭази, ужәлари убызшәеи рахь иумоу абзиабара роуп”.

“Ашәа злымҵуа ажәа ыҟаӡам, аха ауаа ргәаҿы инеиртә еиԥш аҟаҵара – уи баҩхатәроуп, анцәа иуаҭәеишьазароуп. Убас иҟаз дреиуан Ражден Гәымба.

Ибзианы исгәалашәоит, сахьиз, Отаԥ ақыҭан Ражден ихор аауеит анырҳәалак, хәыҷгьы-дугьы агәырӷьара ду ҳнаҭон. Отаԥтәи асцена хәыҷы иҳамаз, ауаа замкуа аҟынӡа еизон ажәлар. Иашәақәа иазыӡырҩуаз, аԥсуа гәы змоу зегьы аргәырӷьон”.
Тото Аџьапуа ишазгәеиҭаз ала, Ражден Гәымба иашәақәа аԥсуа цәа рыҟәнын, аԥсуа иҟазшьа алубаауан. Ԥсра зқәым аԥсуа жәлар рашәақәа иргәылцәааны иусумҭақәа аԥиҵон.

“Сгәаанагарала, ажәлар ирылаҵәаз, ииҩыз асимфониақәеи, еиҳараӡак иашәа маҷқәеи ирыбзоураны, ажәлар ргәаҿы наунагӡа даанхоит, ԥсра иқәӡам”, – ҳәа азгәеиҭеит Тото Аџьапуа.

(АП): Ражден Џьгәаҭан-иԥа Гәымба диит цәыббра 12, 1926 шықәсазы Гәдоуҭа араион Дәрыԥшь ақыҭан Аԥснытәи АССР.
1957 – 1959 шықәсқәа рзы аҵара иҵон Қарҭтәи аконсерваториаҿы.

1975 шықәсазы қәҿиарала Москватәи аконсерваториа далгоит.

1940 – 1954 шш. шықәсқәа рзы наԥхгара аиҭон Аԥсны ахаԥшьгаратә ашәаҳәаратә коллективқәа.

1954 – 1957 шш. 1959 – 1968 шш. рзи – Аԥснытәи АССР аҳәынҭқарратә ансамбль сахьаркыратә наԥхгаҩыс даман.

Қырҭтәылатәи ССР акультура зҽаԥсазтәыз артист, Аԥснытәи ССР зҽаԥсазтәыз аусзуҩы.

Иара дравторын апьесақәа «Аӡыхь аҿы», «Ахра ашәа», «Ашьхаруаа рыкәашара» уб. иҵ.

Д. Гәлиа, А. Џьонуа, А. Лашәриа, И. Ҭарба, Кь. Чачхалиа, Б. Шьынқәба ражәеинраалақәеи, иара убас адраматә спектакльқәеи рзы ашәақәа иҩҩуан.

Иԥсҭазаара далҵит нанҳәа 21, 2007 шықәсазы.

Ражден Гәымба ихьӡ ахуп Аԥснытәи аҳәынҭқарратә филармониа.